વેણીનાં ફૂલ/ગામડાંના વીસામા
| ← સાગરમાં વસનાર | વેણીનાં ફૂલ ગામડાંના વીસામા ઝવેરચંદ મેઘાણી ૧૯૨૮ |
ગામડાંના વીસામા(૨) → |
નાનાં શાં ગામડાંના નાના વિસામા
ચોરો ને બીજો ચબૂતરો જી રે
ચોરે પૂછાય મારા બાપુનાં બેસણાં
ચબૂતરે પોપટડા જી રે !
ચોરે ડોલે છે રાજદરબારી ડાયરા
ચબૂતરે પંખીડલાં જી રે !
ચોરે પરભૂનાં ગીત ગાતા પટેલીયા
ચબૂતરે પારેવડાં જી રે !
ચોરે સાધૂડલાંને દેતાં સદાવ્રત
ચબૂતરે ચણ્ય નીરતાં જી રે !
ચોરે બેસીને ધ્યાન રાખે છે ચોકીયાત
ચબૂતરે ધ્યાન વાણીયા જી રે !
ચોરામાં દેવ રામસીતાનાં જોડલાં
ચબૂતરે દેવ મોરલા જી રે !
ચોરે ઠાકોરજીની ઝાલર ઝણંકે
ચબૂતરે ઘૂઘવાટા જી રે !
નાનાં શાં ગામડાંના નાના વિસામા
ચોરો ને બીજો ચબૂતરો જી રે !
🙖