વેણીનાં ફૂલ/તલવારનો વારસદાર
| ← બ્હેન હિન્દવાણી | વેણીનાં ફૂલ તલવારનો વારસદાર ઝવેરચંદ મેઘાણી ૧૯૨૮ |
જાણવા જેવા શબ્દોનો કોષ → |
તલવારનો વારસદાર
[ઢાળ–શેના લીધા મારા શ્યામ
અબોલડા આ શેના લીધા રે!]
ભેટ્યે ઝૂલે છે તલવાર
વીરાજી કેરી ભેટે ઝુલે રે.
ભીંતે ઝુલે છે તલવાર
બાપુજી કેરી ભીંતે ઝૂલે રે.
મારા બાપૂને ! બે બે કુંવરિયા
બે વચ્ચે પાડ્યા છે ભાગ:
[૧]હાં રે બેની! બે વચ્ચે પાડ્યા છે ભાગ;
વીરાજી કેરી ભેટ્યે ઝુલેરે.
મોટે માગી છે મો’લ મ્હેલાતું વાડીયું
નાને માંગી છે તલવાર
હાં રે બેની ! નાને માંગી છે તલવાર – વીરાજી૦
મોટો મ્હાલે છે મો’લ મોડીની સાયબી
નાનો ખેલે છે શિકાર – વીરાજી૦
મોટો ચડિયો છે કાંઈ હાથી-અંબાડિયે
નાનેરો ઘોડો અસવાર – વીરાજી૦
મોટો કાઢે છે રોજ કાવા કસૂંબલા
નાનેરો ઘૂમે ઘમસાણ – વીરાજી૦
મોટો પોઢે છે લાલ રંગીલે ઢોલીએ
નાનો ડુંગરડાની ધાર – વીરાજી૦
મોટો મઢાવે વેઢે વીંટી ને હારલા
નાનો સજાવે તલવાર – વીરાજી૦
મોટાને સોઇં હીર–ઝરિયાની આંગડી
નાનાને ગેંડાની ઢાલ – વીરજી૦
મોટો સંતાય સુણી શત્રુના રીડિયા
નાનેરો દ્યે છે પડકાર – વીરાજી૦
મોટો ભાગ્યો છે સેન શત્રુનાં ભાળતાં
નાનેરો [૨]ઝીંકે છે ઘાવ – વીરાજી૦
મોટેરે માડી ! તારી કૂખૂં લજાવી
નાને ઉજાળ્યા અવતાર – વીરજી૦
મોટાનાં મોત ચાર ડાઘુડે જાણિયાં
નાનાની ખાંભી પૂજાય – વીરાજી૦
ભેટે ઝુલે છે તલવાર
વીરાજી કેરી ભેટે ઝુલે રે !
ભીંતે ઝુલે છે તલવાર
બાપૂજી કેરી ભીંતે ઝુલે રે!