કલાપીનો કેકારવ/એકલો બોલ

વિકિસ્રોતમાંથી
Jump to navigation Jump to search
← એક આશા કલાપીનો કેકારવ
એકલો બોલ
કલાપી
ન્હાસી જતી મૃગી ને ઘવાયેલો મૃગ →


એકલો બોલ

'ચાહું છું,' બાલે ! તું કહે છે !
તો કાં આંખ મહીં ના એ છે ?
ના કાં એ ગાલે છે રમતું !
     ખેલાડી પેલું ? આનન્દી પેલું ?

મ્હારામાં - એકજમાં - ત્હારો
હૈયે હોત ઠલાવ્યો ભારો:
તો - તો વ્હાલી બાલે !
             આવી કંગાલી શાને ?
             શાને દેવાતે ભાલે ?

જ્યાં જ્યાં ભેટો થાતો, બાલે !
ત્યાં આ રક્ત ઉછાળે ચાલે !
થંડું ત્યાં ત્હારૂં તો ભાલે
               પ્રેમે ઉત્તર શો ?

બોલ એકલો જ તુજ દિલ ખોલે !
મ્હારૂં નામ મૃદુ શી બોલે !
ત્હો યે આ ઉરના જુસ્સા ના
                તવ હૈયું ફોલે !
        બાલે ! તવ હૈયું ફોલે !

જોને - પરવાળાં ત્હારાં એ
આ ઓષ્ઠે કો દી શાનાં આવે !
ત્હોયે હિમભર્યા સિન્ધુની
                   શરદી કાં લાવે ?
           બાલે ! શરદી કાં લાવે ?

શબ્દ માત્ર શું હું જેવાને ?

બોલેલા તું જેવીના એ !
પ્રીતિ શી ? જે ના છે ગાલે -
                    ભાલે કે ચાલે !

રાતે સપને તું આવે છે:
ત્યાં તો કૈં જૂદું લવે છે !
કમ્પે કમ્પ, સ્મિતે સ્મિત, બાલે !
                    સપનાં તો મ્હાલે !

સપનાં તો સપનાં સપનાં છે !
જાગી જોતાં શા ખપનાં છે ?
ભેટન્તાં અહિંયાં તો બાથે
                     પ્રતિમા આરસની !

બાલે ! આ હૈયે ચમ્પાતાં -
જો તુંને સુખભાન કશું ના,
                      તો તું ડાહી હોશે !
                      તો તું સુન્દર હોશે !
                      નિત્યે નિર્મલ હોશે-
                      કિન્તુ પ્રીતિ ક્યાં ?

૪-૬-૯૮