કલ્યાણિકા/અનિર્વાચ્ય પરતત્ત્વ

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← ઊડવાં આઘાં આઘાં રે કલ્યાણિકા
અનિર્વાચ્ય પરતત્ત્વ
અરદેશર ખબરદાર
અગમની ઓળખ →
* રાગ કેદાર - તાલ ત્રિતાલ[૧] *


રે પ્રભુ ! કેમ તને બતલાવું ?
કેમ તને બતલાવું ?
રે પ્રભુ ! કેમ તને બતલાવું ?
લોક પૂછે પ્રભુ કેવો છે તે
કેમ કરી સમજાવું ?
રે પ્રભુ ! કેમ તને બતલાવું ?-(ધ્રુવ)

અગમ, અરૂપ, અગોચર, અનહદ :
શા અંકે અંકાવું ?
એક અકળ અંતરનો વાસી
ક્યમ શબ્દે ઉતરાવું ?
રે પ્રભુ ! કેમ તને બતલાવું ?

વેદ પુરાણ કુરાન અવસ્તા
શીખવે તે હું શિખાવું ;
પણ અક્ષર જ નથી તેને ક્યાં
કાનો માત્રા લગાવું ?
રે પ્રભુ ! કેમ તને બતલાવું ?

સૌ ઇંદ્રિયથી પર છે તેને
ક્યમ અનુબોધે લાવું ?
અલખ અકથ એવો ઉર આણું,
પણ કઈ વાણ વસાવું ?
રે પ્રભુ ! કેમ તને બતલાવું ?

સ્વપ્ન ન જોયું તે ક્યમ જાણે
સ્વપ્ન ઊગે છે આ'વું ?
અજન્મ ને અવિગત એવાને
શું કલ્પી કલ્પાવું ?
રે પ્રભુ ! કેમ તને બતલાવું ?

ખાટું, ખારું, તીખું, મોળું,
મધુરું, કડવું ગણાવું :
પણ જે સ્વાદ ન જાણ્યો જીભે,
તે કઈ રીત રસાવું ?
રે પ્રભુ ! કેમ તને બતલાવું ?

નિર્ગુણના શા ગુણ હું ગાઉં ?
કઈ ભાષા ઉપજાવું ?
એ અમી તો ચાખ્યે જ જણાતું :
અદ્દલ હું ક્યમ દર્શાવું ?
રે પ્રભુ ! કેમ તને બતલાવું ?

લોક પૂછે પ્રભુ કેવો છે તે
કેમ કરી સમજાવું ?
રે પ્રભુ ! કેમ તને બતલાવું ?

-૦-

નોંધ

  1. " મો સમ કૌન કુટિલ ખલ કામી, " એ રાહ.

ટિપ્પણ

ટિપ્પણ:અનિર્વાચ્ય પરતત્ત્વ