કલ્યાણિકા/અમૃતપાત્ર

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← નવપ્રકાશ કલ્યાણિકા
અમૃતપાત્ર
અરદેશર ખબરદાર
દ્વિરંગી જ્યોત →
* રાગ જિલ્લા - ઝિંઝોટી - ત્રિતાલ[૧] *



પ્રાણ ! હવે તું છોડ અંધારી,
તારી છે રંગત ન્યારી રે !
જોની, તારી છે રંગત ન્યારી રે ! - ( ધ્રુવ )

દુઃખ પ્રપંચ ભરી દુનિયાથી
કેમ જતો તું હારી રે ?
લાખવસા છે પુણ્યભરી આ
જીવનયાત્રા તારી રે !
પ્રાણ ! હવે તું૦ ૧

પ્રભુમંદિર છે તુજ અંતર આ,
તેની પાંચ જ બારી રે :
શબ્દ સ્પર્શ રૂપ ગંધ ને રસથી
ભવની બધી બલિહારી રે.
પ્રાણ ! હવે તું૦ ૨

પંચામૃત એમાંથી ઝરતું
લે તું અંતર ધારી રે !
પ્રભુચરણમાં શું મૂકશે, જવ
આવે તેની સ્વારી રે ?
પ્રાણ ! હવે તું૦ ૩

નથી પાપફળરૂપ જીવન આ,
કે નથી પુષ્પપથારી રે :
પણ પ્રભુચરણે પુણ્યામૃત તુજ
મૂકવાની તૈયારી રે !
પ્રાણ ! હવે તું૦ ૪

બારી બહાર બધી બેજારી,
ભીતર ફૂલની ક્યારી રે :
સૌ તીર્થે નારાયણ નિરખી,
સ્થિર કર મન સંચારી રે !
પ્રાણ ! હવે તું૦ ૫

રે રે પ્રાણ ! પ્રમાદ તજી દે !
આવે પળ અણધારી રે :
તુજ અમીપાત્ર અદ્દલ છલકે, ત્યાં
પ્રભુ લેશે સ્વીકારી રે !
પ્રાણ ! હવે તું૦ ૬

-૦-

નોંધ

  1. " પિયાકે ચિત્ર બિન પ્રીતમ પ્યારે, " - એ રાહ.

ટિપ્પણ

ટિપ્પણ:અમૃતપાત્ર