કલ્યાણિકા/દ્વિરંગી જ્યોત

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← અમૃતપાત્ર કલ્યાણિકા
દ્વિરંગી જ્યોત
અરદેશર ખબરદાર
અજવાળિયાં →


* રાગ માઢ - તાલ ગઝલ - પશ્તો *

ધ્રૂજી ધ્રૂજી જળે ને ધગધગે
જગે જીવનની રસજ્યોત :
જળે જળે છતાં લળી ઝગઝગે,
એવી જીવનની અમીજ્યોત !-( ધ્રુવ )

સોનલ કોડિયે અમૃત ભરિયાં,
કિરણવણી મહીં વાટ ;
વેદનઝાળથી તે સળગાવી,
જળતી ઝગે જગપાટ રે !
એવી જીવનની અમીજ્યોત !

અંદર અમૃતરસ ભર છલકે,
ઉપર વેદનઝાળ :
અમૃતપાન કરે તે જળે હો,
સંતોનો પંથ કરાળ રે !
એવી જીવનની અમીજ્યોત !

અંધારે ઊગશે તારલા ને
કાંટે ફોરશે ફૂલ ;
જળવું જગતને બારણે ને
ઝબકી લઈ થવું ગૂલ રે !
એવી જીવનની અમીજ્યોત !

દારુણ વેદના હો એ ભલે, પણ
અંતરબળ દે એ જ :
વાદળવહન વિના નહીં વૃષ્ટિ ને
અગ્નિ વિના નહીં તેજ રે !
એવી જીવનની અમીજ્યોત !

ક્યાં લગી જળતું આ જીવન જાશે,
ક્યાં છે એ પ્રશ્નનું કામ ?
જ્વલન જશે તો એ જ્યોતે બુઝાશે :
ક્યાં રહેશે જીવન નામ રે ?
એવી જીવનની અમીજ્યોત !

જીવનજોગી હો ! દિલડું જળાવતો
અમૃત પીજે એ એમ !
જ્યોતિફુવારા એ ઊડશે ને કરશે
સહુનું કલ્યાણ ને ક્ષેમ રે !
એવી જીવનની અમીજ્યોત !

-૦-

ટિપ્પણ

ટિપ્પણ:દ્વિરંગી જ્યોત