કલ્યાણિકા/એક જતારી ઓથ

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← યોગ કલ્યાણિકા
એક જતારી ઓથ
અરદેશર ખબરદાર
ઊડવાં આઘાં આઘાં રે →
રાગ ઠુમરી - તાલ ત્રિતાલ [૧]


નાથ ! મને એક જ તારી ઓથ !
તું જ જીવનની જ્યોત :
નાથ ! મને એક જ તારી ઓથ ! - (ધ્રુવ)

સંધી દુનિયા લાગે અંધી,
અંધ દિસે આકાશ :
એક કિરણ વિણ અંધ બધું રહે,
એક ઊગે નહીં આશ :
નાથ ! મને એક જ તારી ઓથ !

પૃથ્વી ખાલી, સાગર ખાલી,
ખાલી સર્જનખેલ ;
ચેતન વિણ કો જડ નવ જાગે,
ખાલી રહે દિલમહેલ !
નાથ ! મને એક જ તારી ઓથ !

બખ્તર પહેરું, શસ્ત્રશું લહેરું,
બામ્ધું કિલ્લા કોટ :
એક ફૂંકે એ સર્વ તૂટે ત્યાં
કોણ પૂરે મુજ ખોટ ?
નાથ ! મને એક જ તારી ઓથ !

સાગર તરવા નૌકા બેઠો,
નૌકા તૂટી જાય :
નાથ નામનો મળે તરાપો,
તો જળ પાર તરાય !
નાથ ! મને એક જ તારી ઓથ !

દેવ ફિરસ્તાને શું પૂજું ?
એ સૌ તુજ મહોતાજ :
નાથ ! મને તુજ ઓથ મળી ત્યાં
ચૌદ ભુવનનું રાજ !
નાથ ! મને એક જ તારી ઓથ !

નોંધ

  1. "કંથ બિન રહી અકેલી મોરી જાન," એ રાહ.
-૦-