કલ્યાણિકા/યોગ

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← પૂર્ણ જીવનની સુંદરતા કલ્યાણિકા
યોગ
અરદેશર ખબરદાર
એક જતારી ઓથ →
રાગ માઢ - તાલ દાદરો


તારો યોગ ક્યાં સાધું, નાથ હો !
તેં તે છોડ્યો ક્યારે સંગાથ ? - (ધ્રુવ)

અંતરમાં તુજ થાય ટકોરા ને
ચાલે ચેતન તુજ બહાર ;
પળપળ તારો શ્વાસ ભરું, તું
દૂર રહ્યો ક્યાં લગાર રે ?
તેં તે છોડ્યો ક્યારે સંગાથ ? - તારો૦

ક્ષણક્ષણ શિરમાં સણકા ફૂટે ને
આંખે વહે તુજ વહેણ :
તારાં જ ગાન ગવાડ્યાં હું ગાઉં,
તારાં જ કહું રસકહેણ રે :
તેં તે છોડ્યો ક્યારે સંગાથ ? - તારો૦

અંતર પુણ્યની મેખ જડે ત્યાં
લાગે ખીલા મુજ દેહ :
નેણનાં નેવ ઝરે શતધારે હો,
નાથ ! શા તુજ અમીમેહ રે !
તેં તે છોડ્યો ક્યારે સંગાથ ? - તારો૦

ભરભર કુંભ ભર્યો છલકાય આ,
માય નહીં વધુ નીર ;
ભીતર નખશિખ તું જ ભર્યો પછી
સાધું કયે બીજે તીર રે ?
તેં તે છોડ્યો ક્યારે સંગાથ ? - તારો૦

અગ્નિમાં ભળતાં વાયુ મળે ને
વાયુમાં ભળતાં આકાશ :
નાથ ! હું તો તુજ કોટે રમું, ત્યાં
યોગ ને ભોગ સૌ પાશ રે !
તેં તે છોડ્યો ક્યારે સંગાથ ? - તારો૦

સ્નેહસાયુજ્ય હું પામિયો, ત્યાં
સાધું અવર શા યોગ ?
નાથ ! આ દેહમાં ડંખ પડે, તે તો
કીટ ભમરીના જોગ રે !
તેં તે છોડ્યો ક્યારે સંગાથ ? - તારો૦

-૦-