કલ્યાણિકા/પ્રભુની સ્નેહઠગાઈ
| ← દિશાસૂચન | કલ્યાણિકા પ્રભુની સ્નેહઠગાઈ અરદેશર ખબરદાર |
પ્રભુનો જ સાથ → |
પ્રભુની સ્નેહઠગાઈ
( ધોળ )
જા રે પ્રભુ ! આ તારું જગત નથી રે જોઈતું !
એને આગળ કરી તું ગુપ્ત રહે શું દૂર ?
તારી લાખ લીલામાં સર્વ રહ્યા લોભાઈને,
પણ મુજને તો જોઇએ એક જ ઉરનૂર :
જા રે પ્રભુ ! આ તારું જગત નથી રે જોઈતું ! ૧
તારો સૂરજ આવી બાંધે તેજકિરણ વડે,
તુજ તારા અમને તમજાળે ઘસડી જાય;
હું તો તેજ તિમિર વચ્ચે મુજ આંખો ઠેરવું,
તારી છાય જરા પકડું કે તું લોપાય !
જા રે પ્રભુ ! આ તારું જગત નથી રે જોઈતું ! ૨
તુજ સંદેશા જેવા ગગને ઘૂમી રહે,
તારાં ઘોર નગારાં વાગી રહે આકાશ;
અમૃતબિંદુ પડે ટપકી તુજ પ્રેમાળ પાત્રથી,
ભીંજવે ભૂમિ, પરંતુ ભીંજાય ન મારી આશ :
જા રે પ્રભુ ! આ તારું જગત નથી રે જોઈતું ! ૩
તારી વીજલપાંખ ઊડી રહે વાદળ વાદળે,
પળમાં ક્ઝબકાવી જગવે સૂતા અંધાર :
તારાં સ્વર્ગતણાં દ્વારોના ઢાંકઉઘાડ એ
આંજે સૌને, પણ ક્યાં છે તુજ અંતરદ્વાર ?
જા રે પ્રભુ ! આ તારું જગત નથી રે જોઈતું ! ૪
રંગે રંગભર્યાં આભે તારાં પગલાં પડે,
જાણે એ પૂઠે પડતાં જડશે તુજ વાટ;
ઘડીના રંગો એ જગને ઝૂઅવી રહે; પણ હું તો
માગું તુજને, -નહીં તુજ વસ્ત્રોના ઝળકાટ !
જા રે પ્રભુ ! આ તારું જગત નથી રે જોઈતું ! ૫
તારી માયાનાં નખરાં મોહી રહે સર્વને,
મારું મનુજહૃદય સપડાય તહીં ધડી એક;
તારા ઠોકા ત્યાં સુણતાં જાગે ફરી આત્મ મુજ; -
આ તો તું નહીં, તારી છે પ્રતિમૂર્તિ અનેક !
જા રે પ્રભુ ! આ તારું જગત નથી રે જોઈતું ! ૬
જીવનભર આવાં જ રમકડાંથી શું રાચવું ?
અમારે રોવું ને તારે જોવું સંતાઈ ?
તું શું નવાં નવાં આપે તે નહીં ભાંગી જશે ?
જા રે !-આ તો તારી શાશ્વત સ્નેહઠગાઈ !
જા રે પ્રભુ ! આ તારું જગત નથી રે જોઈતું ! ૭
તારી દિશા દિશાના પડદા માંડું ખોલવા,
મારા રંગ બધા ધોઈ નાખું રસલોલ;
ઠોકી ઠોકી તારાં દ્વાર તને પજવું હું યે,
તારી પાસ અદ્દ્લ બોલાવી દઉં એક બોલ !
જા રે પ્રભુ ! જોજે હસી પડશે મુજ બળ જોઈ તું ! ૮