કલ્યાણિકા/સતત વિશ્વવસંત

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← ભક્તવીરની વાંછા કલ્યાણિકા
સતત વિશ્વવસંત
અરદેશર ખબરદાર
દૂર જતાં ડગલાં →
* રાગ કાફી - હોરી *


વિલસે વિશ્વલીલા વસંતે,
નાથ નાચે અનંતે ! - (ધ્રુવ)

આનંદ આનંદ ઊછળી રહ્યો છે તારક સૂરજ ચંદે,
નંદનવન ત્રિભુવન જનજીવન એ નવયૌવન સ્પંદે ;
તગે તનમન તંતતંતે ! -
નાથ નાચે અનંતે !

ગાલ ગુલાલથી લાલ કરી નાચે સંધ્યા ઉષા આભસ્કંધે ;
વન ઉપવનમાં પવન વાઈ ગાતો, મુદિત સુમનની સુગંધે ;
ચઢે રંગ એ વિશ્વચંતે ! -
નાથ નાચે અનંતે !

તાન તનાવટ, ગાન જમાવટ, તાલ સુરાવટ સંધે ;
જળજળ થળથળ ભૂરકી પડી એ પ્રબળ પ્રબોધન બંધે ;
ખલક ખીલી રહી ખૂબ ખંતે ! -
નાથ નાચે અનંતે !

મસ્ત હલે રતનાગર સાગર, ફાગ રમી અમી મંથે ;
તતથે‌ઈકારે ગગન ઘન ઘૂમે, રસબસ થઈ ભૂમિપંથે :
દિસે દોર ઝૂલતા દિગંતે ! -
નાથ નાચે અનંતે !

ભીતર બાહર, ગુપ્ત કે જાહર, ફાગ જ વિશ્વ સાદ્યંતે,
એ પીચકારી ઝીલીને ભીંજાવી આ જગત ભગત સાધુ સંતે,
અમર હોરી ગાઈ ગુણવંતે ! -
નાથ નાચે અનંતે !

આવોની ભૈયા ! ખલક ખેલૈયા ! તતતતથૈયા જ અંતે !
એ રસરંગે સતત વિશ્વસંગે આ રમિયે આનંદે વસંતે !
અદ્દલ આવો હૃદય હસંતે ! -
નાથ નાચે અનંતે !

સતત ખેલો વિશ્વવસંતે,
નાથ સાથે અનંતે !

-૦-

ટિપ્પણ

ટિપ્પણ : સતત વિશ્વવસંત