રાષ્ટ્રિકા/દેવાસુર સંગ્રામ

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← થંભી જા રે માત ! રાષ્ટ્રિકા
દેવાસુર સંગ્રામ
અરદેશર ખબરદાર
બ્રીટનને →
* ભૈરવી[૧] *


દેવાસુર સંગ્રામ, આ તો દેવાસુર સંગ્રામ !
દેશ કાળ સૌ તૂટી પડ્યા ત્યાં ક્યાં સમરાંગણ નામ ?
આ તો દેવાસુર સંગ્રામ ! -

સમરાંગણ ક્યાં જઈએ શોધી ? છે સમરાંગણ ઉર :
કુરુક્ષેત્ર કે થરમાપિલિથી અધિક વધે શાં શૂર !
રણે એ ખેલે આતમરામ :
આ તો દેવાસુર સંગ્રામ ! ૧

એ જ દાંડી ને એ જ ઊંટડી, ધરાસણા પણ એ જ :
એ જ વડાળા, લાઠીચોક, હા એ જ પરમ ઉરતેજ !
મરણિયાનાં સૌ અમ્મર ધામ !
આ તો દેવાસુર સંગ્રામ ! ૨

રસની રેલ રહે રેલાતી, ત્યાં રેલે રસવીર :
રણનાં કારણ મારણ તારણ, રણ ખેલે રણધીર !
નહીં તે પૂછે રણનું નામ :
આ તો દેવાસુર સંગ્રામ ! ૩

રણધીરાની થાય કસોટી, વીરા ! ઊતરો પાર !
મરીને જીવવાનો છે મોકો, નહિ મારીને માર !
પછી તો છે અવિચળ વિશ્રામ :
આ તો દેવાસુર સંગ્રામ ! ૪

આત્મશૌર્યની ઑર જ લીલા, દિવ્ય દેવનાં નૂર :
છો અંધાર વીંટે રવિને પણ રવિ ભેદે ભરપૂર !
અદલ એ સમરાંગણ અભિરામ :
આ તો દેવાસુર સંગ્રામ ! ૫

  1. તા. ૫-૯-૩૦.
-૦-