રાષ્ટ્રિકા/બ્રીટનને
| ← દેવાસુર સંગ્રામ | રાષ્ટ્રિકા બ્રીટનને અરદેશર ખબરદાર |
વંટોળિયો ને વેરાગણ → |
| * રાગ માઢ[૧] * |
બ્રીટનને
• રાગ માઢ[૨] •
મારા લાખેણા વીર મરાય,
બ્રીટન ! તારી છાતી શેં પથ્થર થાય ?
નહીં દમદાટી, નહીં તુજ લાઠી,
નહીં તુજ બંદુક તોપ;
આજ કશાં અહીં કામ ન આવે,
વ્યર્થ જળે તુજ કોપ !
બ્રીટન ! તારી છાતી શેં પથ્થર થાય ? ૧
લાખોને મોલના વીર આ પડતા
ધગધગતે અંગાર :
લાખોને મોલની સ્વાધીનતાને
આણશે ભારતદ્વાર !
બ્રીટન ! તારી છાતી શેં પથ્થર થાય ? ૨
દેહ ને દેહનાં યુદ્ધ નથી આ,
એ તો છે આત્મનાં યુદ્ધ ;
દેહ કચડતાં તો આત્મ કસાયને
થાય અધિક વીર શુદ્ધ :
બ્રીટન ! તારી છાતી શેં પથ્થર થાય ? ૩
અડગ આ આત્મા ભારતકેરો
નહીં આવે તુજ હાથ :
માર ને પીટ કે બંધન કોને ?
આ શી હવામાં બાથ ?
બ્રીટન ! તારી છાતી શેં પથ્થર થાય ? ૪
તારે જ બાર શું થાય નિરંતર
સ્વાધીનતાનાં ગાન ?
ક્યાં ગઈ માનવતા વર તારી ?-
ભરભર લે બલિદાન !
બ્રીટન ! તારી છાતી શેં પથ્થર થાય ? ૫
પૂર્વ ને પશ્ચિમના છેડા બે બાંધી
સાંકળિયું આકાશ :
આવ રે, સ્નેહે બંધાઇને પૂરિયે
જગબંધુત્વની આશ !
બ્રીટન ! તારી છાતી શેં પથ્થર થાય ? ૬
કાળના ચક્રમાં ફરતાં આકાશે
કોનાં રહ્યાં મહારાજ્ય ?
અદલ ઉઘાડો રે આંખ પ્રભુ તુજ,
સ્નેહ જ છે જગતાજ !
બ્રીટન ! તારી છાતી શેં પથ્થર થાય ? ૭