રાષ્ટ્રિકા/ધર્મને પંથે

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← ઘંટા રાષ્ટ્રિકા
ધર્મને પંથે
અરદેશર ખબરદાર
એક વાર મરી ફીટો →
* રાગ ભૈરવી - તાલ દાદરો *



તારું ભાવિ સૂતરને તાર લટકે, ભારતવાસી !
એ શું જોઈ રહ્યો આ વાર ? ઊઠે કેમ ન ત્રાસી ?

તાતી કઢા આ ઊકળી રહી ત્યાં
પડતા પ્રાણ અમોલ :
સ્નેહ ને દ્વેષ, ને હિંસા અહિંસાનાં
આજ તોલાતાં તોલ :
તારું અંતર ત્રાજવું આજ તું જરી જોની તપાસી !
તારું ભાવિ સૂતરને તાર લટકે, ભારતવાસી ! ૧

પુણ્યના પંથની પગથી પડી છે
કષ્ટ થકી ભરપૂર :
તારે તે સ્વર્ગ‌અટારીએ ચડવું કે
પડવું સદા ખોઈ નૂર ?
તારે ખોઈ શું જીવન પ્રાણ, જોવી સ્વદેશની હાંસી ?
તારું ભાવિ સૂતરને તાર લટકે, ભારતવાસી ! ૨

તાતી કઢા ઊકળે કે ઢળે, પણ
તારે તો એક જ ચંત :
સત્યના સાહેબો રાખીને સાથે
ચાલ્યો જા ધર્મને પંથ !
ક્યાંથી સ્વાર્પણ વિણ ઉદ્ધાર ? ક્યાં મળે મક્કા ને કાશી ?
તારું ભાવિ સૂતરને તાર લટકે, ભારતવાસી ! ૩


-૦-