રાષ્ટ્રિકા/રળિયામણી ગુજરાત
| ← રાષ્ટ્રિકા : ગુણગરવી ગુજરાત રાસચંદ્રિકા : ગુણવંતી ગુજરાત |
રાષ્ટ્રિકા / રાસચંદ્રિકા રળિયામણી ગુજરાત અરદેશર ખબરદાર |
રાષ્ટ્રિકા : ગરવી ગુજરાત રાસચંદ્રિકા : ગુણીયલ હો ગુજરાત! → |
રળિયામણી ગુજરાત
• ઢાળ : પૂનમ ચાંદની ખીલી પૂરી અહીં રે •
સુરકન્યા જેવી મારી ગુજરાત સોહામણી રે ,
ઢળકે અઢળક એની લક્ષ્મીના અંબાર :
આવો, ઝીલવા સૌ એ ગુજરાતે રળિયામણી રે !
કોકિલકંઠી કુંજે ઝૂલે એ કોડામણી રે :
નીલમનીલી એની ઝાલરના ઝબકાર :
આવો, ઝીલવા સૌ એ ગુજરાતે રળિયામણી રે !
હરિયાળી મનને હરે, વનવન ખોલે પ્રાણ :
ફૂલફૂલના ઉલ્લાસમાં લળકે જગકલ્યાણ :
વીંટે લોલવિલોલ લતા તરુને લોભામણી રે ,
એવી વીંટી ર્હે ભારતઉર એ નિરધાર :
આવો, ઝીલવા સૌ એ ગુજરાતે રળિયામણી રે !
સાગર ગરજે આંગણે, રસસરિતા ઉભરાય :
ગિરિગહ્વર સરવર ભર્યાં, ઉરઔદાર્ય સુહાય :
રુપાળી રઢિયાળી કાલી હ્રદયહુલામણી રે,
ધીરી વીરી સંયમી ડહાપણનો ભંડાર :
આવો, ઝીલવા સૌ એ ગુજરાતે રળિયામણી રે !
સ્નેહ, શૌર્ય ને ભક્તિના યુગયુગ ઉચરે મંત્ર :
ધર્મધરા સંતોતણી, કર્મધરા ય સ્વતંત્ર :
આવો, ઝીલિયે એની વિશ્વવિશાળ વધામણી રે ,
એને ચરણે સો સો સફળ અદલ અવતાર :
આવો, ઝીલવા સૌ એ ગુજરાતે રળિયામણી રે !