રાસચંદ્રિકા/ગુર્જરી વીરાંગના
| ← ગરાસિયો ને ગરાસિયણ | રાસચંદ્રિકા ગુર્જરી વીરાંગના અરદેશર ખબરદાર |
પગલાં → |
ગુર્જરી વીરાંગના
♦ શ્યામ રંગ સમીપે ન જાવું . ♦
કાયરાની નાર શું ગણાઉં?
ઊઠો, સ્વામી મારા !
કાયરાની નાર શું ગણાઉં? —
સારી ગુજરાત આજ ખળભળી છે ઊઠી,
હું જ બેસી હાલેરાં શું ગાઉં ?
ઊઠો, સ્વામી મારા ! ૧
શેરી કેરી નાર બધી ટૂંપી ટૂંપી ખાશે,
ફટ રે અલી ! માટી તારો મ્યાઉં !
ઊઠો, સ્વામી મારા ! ૨
ગડગડ્યાં નિશાન, વાગે શૂર રણતૂર આ,
હાક બધે સુણી અકળાઉં:
ઊઠો, સ્વામી મારા ! ૩
કેસરીની નાર હું કે ઠેસ ખાતી લોંકડી,
વેશ આવો દેખી લજવાઉં :
ઊઠો, સ્વામી મારા ! ૪
હોય વીરશોણિત તે ઊનું ઊનું ઊછળે,
હું તે શું આ હિમમાં થિજાઉં ?
ઊઠો, સ્વામી મારા ! ૫
પાઘ બાંધું કેસરી ને કમર બાંધું કસકસી;
ધસમસી ઝુકાવો, હું હુલાઉં !
ઊઠો, સ્વામી મારા ! ૬
અંગના ભલે હું તોય વીરની વીરાંગના,
વીરના જ વહાલમાં ગૂંથાઉં:
ઊઠો, સ્વામી મારા ! ૭
વીરની ઘડી ખરી, ન કાયરાની જીંદગી:
વધો, સ્વામી ! જયગીતો હું ગાઉં !
ઊઠો, સ્વામી મારા ! ૮