રાસચંદ્રિકા/પૂજન
| ← દીપિકા | રાસચંદ્રિકા પૂજન અરદેશર ખબરદાર |
રસગાથા → |
પૂજન
♦ અલબેલી રે અંબે માત, જોવાને જઇએ. ♦
જયજય હો જગની માત ! પૂજીએ પ્રાણ ભરી :
કીધું સકળ જગત રળિયાત : પૂજીએ પ્રાણ ભરી. —
પળપળ પૂજીએ, કલકલ કૂજીએ, ગરબે ઝૂઝીએ સર્વ રે;
મા ! તુજ શરણે મંગલ સ્મરણે, સફળ બને આ પર્વ :
પૂજીએ પ્રાણ ભરી. ૧
તુજ નંદન-આંગણિયે તો, મા ! પર્વ સદા ઉજવાય રે;
ઘૂમતી તારલિયોની આંખે તારાં તેજ પુરાય :
પૂજીએ પ્રાણ ભરી. ૨
મા તુજ ગરબો ભરતો આભે ચેતનના અંબાર રે;
અમ ગરબામાં પણ આજે, મા ! પૂરજે તુજ ઝબકાર !
પૂજીએ પ્રાણ ભરી . ૩
રસના રાસ રમી તુજ ચોકે, જગત ખીલે ચોમેર રે :
એ રસમાં રસમય બનતાં સહુ ઝીલીએ, મા તુજ મહેર !
પૂજીએ પ્રાણ ભરી. ૪
વિરાટ તુજ પગલીપગલીએ અદ્દલ ઝરે તુજ ઓજ રે :
તુજ આંગણ અમ પગલી પણ, મા ! ઠમકી રહો એમ રોજ !
પૂજીએ પ્રાણ ભરી. ૫
જયજય હો જગની માત ! પૂજીએ પ્રાણ ભરી :
બની ભક્તિરસે રળિયાત, પૂજીએ પ્રાણ ભરી.