રાસચંદ્રિકા/પ્રાણનાં લહેણાં
| ← ફૂલડાંની છાબ | રાસચંદ્રિકા પ્રાણનાં લહેણાં અરદેશર ખબરદાર |
વહાલની વેણું → |
પ્રાણનાં લહેણાં
♦ અમરવાડીમાં ડંકો વાગે છે . ♦
કોઈ લટકે ને મટકે આવે છે,
મારા પ્રાણનાં લહેણાં લાવે છે:
કોઈ લટકે ને મટકે આવે છે. ૧
મારું આપ્યું તો એણે છે રાખ્યું,
મારાભાગ્યનું જોણું છે ઝાંખ્યું :
કોઈ લટકે ને મટકે આવે છે. ૨
મારો આત્મા વિલાયો ને તરસ્યો,
મારું તન શોધ્યું ને ઘન વરસ્યો:
કોઈ લટકે ને મટકે આવે છે. ૩
મારાં લીધાં છે હીરા ને મોતી,
ભરી તેમાં છે અણમૂલ કો જ્યોતિ:
કોઈ લટકે ને મટકે આવે છે. ૪
મારાં ભાગ્યનાં કુંકુમ છે લીધાં,
તેનાં અજબ ઉદય ને અસ્ત કીધાં:
કોઈ લટકે ને મટકે આવે છે. ૫
મારાં ચૂંટ્યા સોહાગ ચંદ્ર ચૉડ્યા,
મારા પ્રારબ્ધના લેખ તારલે જોડ્યા:
કોઈ લટકે ને મટકે આવે છે. ૬
મારાં ઉડાવ્યાં સોણલાં વાદળિયે,
ફેમ્કી જીવનની રેખ કાળને તાળિયે:
કોઈ લટકે ને મટકે આવે છે. ૭
તોય ઝરે છે અમી એની આંખોમાં,
ભર્યા સર્જનના સાજ એની પાંખોમાં:
કોઈ લટકે ને મટકે આવે છે. ૮
જુઓ, જુઓ, કોઈ જોગી આવે છે,
જન્મો જન્મનાં લહેણાં લાવે છે:
કોઈ લટકે ને મટકે આવે છે. ૯