રાસચંદ્રિકા/ઉગમતા દેશની પંખીણી
| ← હ્રદયસુધા | રાસચંદ્રિકા ઉગમતા દેશની પંખીણી અરદેશર ખબરદાર |
દિલનાં દાણ → |
ઉગમતા દેશની પંખીણી
♦ પાલવડો મારો મૂકો, મોહનજી. ♦
મેલેની હાથ મારો, મૂકો મોહનજી !
જાવા દ્યો મુજને, વેળા વીતે;
ઉગમતા દેશની હું તો છું પંખિણી,
પાંખો આ ઢાળું મુજ અહીં શી રીતે?
મેલોની હાથ મારો. ૧
મારા તો દેશની ઊડતી અમરાઇઓ
અજવાળી આશને વીંટે ઉરે;
મારા તો દેશની કુંજ હરિયાળી હો !
જાવું છે મારે ત્યાં વેગે પૂરે:
મેલોની હાથ મારો. ૨
મારા તે વનનો વડલો ગોરંભતો
પ્રારબ્ધશી ગૂંથી તેની ઘેરી ઘટા:
ડાળે ડાળે ઝૂલે ગગનનો મોરલો,
ટહુકે ભરે તે કંઇ અદ્ભુત છટા:
મેલોની હાથ મારો. ૩
મારે તે માંડવે ઝાલર સોનેરી,
વીનળીની વેલશી ઝબકે ખૂલે;
વહાલાંની છાંયશા ચારુ ચંદરવા
મારા તે ચોકમાં દિનદિન ઝૂલે:
મેલોની હાથ મારો. ૪
મારા તે મુલકે અનસ્ત અજવાળાં,
પુણ્યોના ફાલશા ફુવારા ફૂટે;
મારા તે ભાનુનાં કોટિ કિરણથી
અનહદ આનંદની ધારા છૂટે:
મેલોની હાથ મારો. ૫
મેલોની હાથ મારો, મૂકો મોહનજી !
જાવું છે દૂર મારે, વેળા વીતે:
ભાંગ્યા છે કાંટા મારા પગમાં આ વાટમાં,
હૈયું મનાવું કહો અહીં શી રીતે?
મેલોની હાથ મારો. ૬