રાસચંદ્રિકા/કૂવાને કાંઠડે
| ← સવારમાં જળ ભરવા | રાસચંદ્રિકા કૂવાને કાંઠડે અરદેશર ખબરદાર |
વસંતના ભણકા → |
કૂવાને કાંઠડે
♦ પાલવડો મારો મેલો મોહનજી. ♦
બોલ રે બોલ, મારા કાલા હો કહાનજી !
આવડલી મત કોણે દીધી રે લોલ?
કૂવાને કાંઠે અમે મૂંગાં રે ઊભલાં,
કોણે પરાણે ગત કીધી રે લોલ? ૧
સાતે તે સમુદર કૂવામાં સાંપડ્યા,
ગળણું નાખીને રહું ન્યાળી રે લોલ;
બાર બાર વેળા બેડાં ઉતાર્યાં,
ભરું ભરું ને આવે ખાલી રે લોલ. ૨
થાકી થાકીને મારી કેડ વળી વાંકી,
ભમ્મર તો મારી ભીંજાણી રે લોલ;
તેરમી વેળા મ્,આરું બેડલું ઉતાર્યું
લીધું છલોછલ તાણી રે લોલ. ૩
લપતો ને છપતો આવ્યો ત્યાં ક્હાનજી,
ઓળા પડ્યા ત્યાં મારે હૈયે રે લોલ;
છૂટ્યું ત્યાં ગળણું ને ફૂટ્યું તે બેડલું:
તું ને શું, કહાનજી ! કહીએ રે લોલ? ૪
એવું તે કહેતાં મારી આંખોમાં ઊછળે
સાતે સમુદર રેલી રે લોલ:
કહાનજી ! બેડલું ભાંગ્યું તે મારું,
ઘેર કેમ જાઉં એકલી રે લોલ ?- ૫
બારસે બેડલાં કોરાં અપાવું,
અમૃત ભરાવું કૂવે રે લોલ:
સાતે સમુદરનાં ખારાં છે પાણીડાં,
મારા છે સમ, શાની રુવે રે લોલ? - ૬
કૂવાને કાંઠે અમે મૂંગાં રે ઊભલાં,
એવી તે ગત્ર કોણે કીધી રે લોલ ?
બોલ રે બોલ, મારા કાલા હો કહાનજી !
આવડલી મત કોણે દીધી રે લોલ ? ૭