રાસચંદ્રિકા/સવારમાં જળ ભરવા
| ← દૂધડાં દોહતી | રાસચંદ્રિકા સવારમાં જળ ભરવા અરદેશર ખબરદાર |
કૂવાને કાંઠડે → |
સવારમાં જળ ભરવા
♦ રાતું રાતું ગુલાબ ફૂલ, ગુલાબમાં મહેકે છે . ♦
મેંતો લીધું'તું બેડલું માથે, સવારમાં જળ ભરવા,
વાટે નીસરી હું સખીઓની સાથે, સવારમાં જળ ભરવા. ૧
અમે ચાલ્યાં ત્યાં બેલડીઓ બાંધી, સવારમાં જળ ભરવા,
ત્યાં તો લાખેણી લીલા એક લાધી, સવારમાં જળ ભરવા. ૨
અમે કૂવામાં બેડલાં ઉતાર્યાં, સવારમાં જળ ભરવા,
ઊંચે ખેંચી ખેંચીને સહુ હાર્યાં, સવારમાં જળ ભરવા. ૩
અમે દોરીઓ એકમેક લીધા, સવારમાં જળ ભરવા,
તાણી તાણીને અંતે છોડી દીધી, સવારમાં જળ ભરવા. ૪
ત્યાં તો સુણ્યો ધડાકો, અને બીધાં, સવારમાં જળ ભરવા,
ઊડ્યાં છલકતાં પાણી ઊંચે સીધાં : સવારમાં જળ ભરવા. ૫
ભીંજી આંખડી ને લૂછતાં ઊભાં, સવારમાં જળ ભરવા,
ભીંજી ચૂંદડી નિચોવતાં દૂભ્યાં, સવારમાં જળ ભરવા. ૬
અમે કૂવામાં કૌતુક કંઈ દીઠું, સવારમાં જળ ભરવા,
હસતું કહાનડનું મુખ તેમાં મીઠું : સવારમાં જળ ભરવા. ૭
એ તો પેઠો હશે શું મહીં પહેલે, સવારમાં જળ ભરવા?
અમે જઇએ એ કેટલુંક વહેલે, સવારમાં જળ ભરવા? ૮
અમે કૂવે તે કેમ કરી જઇએ, સવારમાં જળ ભરવા?
બેડે પાની કે કહાન ભરી વહીએ, સવારમાં જળ ભરવા? ૯