રાસચંદ્રિકા/ગુલાબ ને ચંબેલી
| ← દિલનાં દાણ | રાસચંદ્રિકા ગુલાબ ને ચંબેલી અરદેશર ખબરદાર |
પ્રેમમંદિર → |
ગુલાબ ને ચંબેલી
♦ રાતું રાતું ગુલાબનું ફૂલ, ગુલાબમાં મહેકે છે.. ♦
આજે પરણે છે વાડીનાં ફૂલ, ગુલાબ ને ચંબેલી,
જોવા આવજો એ જોડી અમૂલ, ગુલાબ ને ચંબેલી! ૧
કાચા સૂતરને બાંધેલે બંધ, ગુલાબ ને ચંબેલી
સાથે મળ્યાં છે સોનું સુગંધ, ગુલાબ ને ચંબેલી. ૨
જેવાં મંગળને શુક્ર છે વ્યોમ, ગુલાબ ને ચંબેલી,
જેવા શોભે અરુણ ને સોમ, , ગુલાબ ને ચંબેલી. ૩
જેવા માણેકને હીરલાના જોગ, ગુલાબ ને ચંબેલી,
એવાં જોડ્યા છે રૂપ એ અમોઘ, ગુલાબ ને ચંબેલી. ૪
વિશ્વે વેરે સુગંધી પરાગ, ગુલાબ ને ચંબેલી,
એ તો સૃષ્ટિના અખંડ સોહાગ, ગુલાબ ને ચંબેલી. ૫
જેવી પાંદડીની ફૂટતી કુમાશ, ગુલાબ ને ચંબેલી,
એવી ખીલવજો અંતરની આશ,, ગુલાબ ને ચંબેલી! ૬
કાંટા વ્હોડ્યા છે ડાળીએ દૂર, , ગુલાબ ને ચંબેલી,
ભળો કૂળા સ્નેહે ભરપૂર, , ગુલાબ ને ચંબેલી! ૭
રૂપે ગુણે રહો ગરવો ગુલાબ ! ગુલાબ ને ચંબેલી,
ભરો ચંબેલી શુદ્ધ સ્નેહછાબ ! , ગુલાબ ને ચંબેલી. ૮
ફોરો આત્માની ફોરમ અતૂલ, ગુલાબ ને ચંબેલી
સદા શોભો ગૃહવાડીનાં ફૂલ, ગુલાબ ને ચંબેલી! ૯