રાસચંદ્રિકા/પારણું
| ← હાલીગોરી | રાસચંદ્રિકા પારણું અરદેશર ખબરદાર |
ઝૂલણું → |
પારણું
♦ ગરબી*[૧] ♦
નીંદરડી આવીને મારા બાગમાં પેઠી;
નીંદરડી તું તો છે ફૂલ-ચોર :
હાં રે પોઢે મારો કનૈયો. ૧
નીંદરડી આવીને મારા વાસમાં પેઠી;
નીંદરડી તું તો છે તેજ -ચોર :
હાં રે પોઢે મારો કનૈયો. ૨
નીંદરડી ! તો કનૈઆની આંખમાં પેઠી;
નીંદરડી ! તું તો છે કીકી-ચોર
હાં રે પોઢે મારો કનૈયો. ૩
નીંદરડી ! કનિયાને તું લોલજે બેઠી !
કનૈયો તું જેવો દૂધ-ચોર :
હાં રે પોઢે મારો કનૈયો. ૪
નીંદરડી ! તું કનૈયાને રહેજે રે ભેટી !
કનૈયો છે પૂરો હૈયા-ચોર :
હાં રે પોઢે મારો કનૈયો. ૫
નીંદરડી ! કનૈયો મારા પ્રાણની પેટી:
જાળવજે મારે એ અમૃત-ચોર !
હાં રે પોઢે મારો કનૈયો. ૬
- ↑ *આ ગરબી નવી રચી છે.