રાસચંદ્રિકા/પોયણી
← લજામણીની વેલી | રાસચંદ્રિકા પોયણી અરદેશર ખબરદાર |
ચાંદલિયા ! ફર તો જરા રે! → |
પોયણી
♦ ગોવાળિયે ઘેલાં કીધાં રે. ♦
નીચે ઊભી હું ડોલું નીરે,
ચાંદલિયે આંખો ઠરી રે ! -
સોના રૂપાથી ઘડ્યું નાવડું એ આવશે,
વહાલમ હંકારે ધીરે ધીરે :
ચાંદલિયે આંખો ઠરી રે ! ૧
જ્યોતિનાં મોતી તરે આભને સરોવરે,
નાખશે ત્યાં જાળ તદબીરે :
ચાંદલિયે આંખો ઠરી રે ! ૨
ગરશે કૈં મોતી નીચે મારે સરોવરે,
ઝીલી તે રાખું મારાં ચીરે :
ચાંદલિયે આંખો ઠરી રે ! ૩
પૂઠે એ ખોળતો ત્યાં આવે ચાંદલિયો,
ડુબકી ભરે હો નીરે તીરે !
ચાંદલિયે આંખો ઠરી રે ! ૪
આવો, ચાંદલિયા ! આ મારા આવાસમાં !
રોજ હું જમાડું મોતી ક્ષીરે :
ચાંદલિયે આંખો ઠરી રે ! ૫
ઘડીક ઠરી શું જાઓ પાછા ગગનમાં ?
જોઈ જોઈ રહેવું તગદીરે !
ચાંદલિયે આંખો ઠરી રે ! ૬
રાતભર જોઈ સુધા ઝીલવી શું દૂરથી ?
હૈયે શું ન ધારું એ લગીરે ?
ચાંદલિયે આંખો ઠરી રે ! ૭
આવો અંધારિયાં, આવો અજવાળિયાં :
હું તો જડાઈ આ જંજીરે !
ચાંદલિયે આંખો ઠરી રે ! ૮