રાસચંદ્રિકા/હૈયાનું રાજ
| ← હૈડાંની આગ | રાસચંદ્રિકા હૈયાનું રાજ અરદેશર ખબરદાર |
ગરાસિયો ને ગરાસિયણ → |
હૈયાનું રાજ
♦ માને તમારું તે તો ઘેલડી ♦
જાઓ, મને ન કશું જોઇએ,
વરણાગિયા !
જાઓ, મને ન કશું જોઇએ !—
ચાલવાની ચટક ના કે મહાલવાની લટકના,
કે આંખડીની મટકમાં મોહીએ :
વરણાગિયા ! ૧
વાંકડિયા વાળમાં કે કંઠ કેરી માળમાં,
કે ચિત્તડું એ જાળમાં ખોઇએ:
વરણાગિયા ! ૨
સ્વર્ણતેજ તારલા કે ઈન્દ્રધનુ હારલા,
કે કો ન એવા ભાર લાધી સોહીએ:
વરણાગિયા : ૩
લાખલાખ સાજથી કે કોટિ અવર કાજથી
કે દિનિયાના રાજથી યે રોઇએ :
વરણાગિયા ! ૪
ભાવભર્યાં ભોજનો કે અમૃતના હોજ હો !
કે થરીએ ના પ્રયોજનોથી કોઇએ:
વરણાગિયા ! ૫
કનકજડિત હાથમાં કે લક્ષ્મીના યે સાથમાં
કે અણમૂલો આ આતમા ન પ્રોઇએ:
વરણાગિયા ! ૬
દ્યો તો અદ્દલ આજ તમ હૈયાકેરું રાજ દ્યો !
નહીં તો આ મહોતાજ શેનાં હોઇએ?
વરણાગિયા !
જાઓ, બીજું ન કશું જોઇએ ! ૭